Berriz 1936 gogoratzen kultur elkartearen helburuak hauexek dira:

Berriz 1936 gogoratzen kultur elkartea independentzia, aniztasuna eta demokrazian oinarritutako hatsarreetan sortu da. Elkartea eztabaida eta ikerkuntza gunea izateko asmoarekin sortu da, eta bere helburu nagusia Berrizek bizi izan duen errealitatearen berri gizarte guztiari ahalik eta zabalen ematea da. Horregatik, Berriz 1936 gogoratzen kultur elkartea independentea, erlijio eta politikarekin lotura bakoa, anitza eta demokratikoa izateko sortu da, bertan partaideek hitz egin eta bide berriak proposatu ditzaten.

Berriz 1936 gogoratzen kultur elkarteak Berrizko historia eta ondare kulturala   ezagutu, ikertu, babestu  eta jakinarazi nahi du, herri kultura suspertuz, erarik zabalenean ulertuta, herriaren protagonismo sozial eta kulturala lortzeko.

Mundu mailako globalizazioaren eragina dela eta, Berrizko jatorrizko tradizio, etnografia, toponimia, kultura eta hizkuntza guztiz galtzeko edo eraldatzeko arriskuan daudenez, Berriz 1936 gogoratzen kultur elkarteak arlo horiek ikertu, aztertu eta babestu nahiko lituzke, orain arteko gizartean zelakoak izan diren ezagutarazteko argitaratzeko eta galtzear badaude babesteko. Horrela, helburutzat dauzka:

-Berrizko eraikin historiko guztiak zerrendatzea, ikertzea, aztertzea, galtzeko arriskuan daudenak babestea  eta dokumentatzea;

-Berrizko pertsonaje historikoak aztertzea, ikertzea eta dokumentatzea;

-Berrizko irakaskuntza historian zehar aztertzea, ikertzea eta dokumentatzea;

-Berrizen gurasoengandik ahoz aho heldu zaigun euskara aztertzea, ikertzea eta dokumentatzea;

-Berrizko elementu etnografikoak zerrendatzea, aztertzea, ikertzea, babestea eta dokumentatzea;

-Berrizko historiako aldiak eta uneak ikertzea, aztertzea eta dokumentatzea, hala nola, Oroimen Historikoa deiturikoa, frankismoaren garaia, XX mendeko mugimendu soziala, XIX eta XX mendeetako langile mugimendua eta karlistadak.

Berriz 1936 gogoratzen kultur elkartearen zeregin nagusietako bat Oroimen Historikoa deitutakoaren inguruan ikertzea eta aztertzea da, hots, 1936 urteko altxamendu militarraren ondorioz sortutako gerrak eta frankismoak eragin zituzten errepresio eta kalte guztiak zerrendatzea, aztertzea, ikertzea eta dokumentatzea. Horretarako honako helburu zehatzak ere baditu:

- 36ko altxamendu militarraren eta estatu-kolpearen ondorioz Berrizen gertatu ziren errepresaliatu guztiak zerrendatzen ahalegintzea, euren Oroimenarekiko, Egiarekiko eta Zuzentasunarekiko eskubidea gorde dadin; ildo honetatik, ‘BERRIZKO IZEN GUZTIAK’ deituriko errepresaliatu-zerrenda egitea du asmotzat;

-herri-erakundeak aipatutako ekimenak lagundu ditzaten eta gauzatu ditzaten sustatzea;

-aipatutako helburuak burutzeko beharrezko ikerketa-lanak egitea; horretarako beharrezko diren koordinazio eta lankidetzak beste erakunde eta elkarteekin gauzatzea;

-eginiko ikerketak eta emaitzak argitaratzea, bereziki senideei euren beharretan laguntzeko eta herriari Oroimena, Egia eta Zuzentasuna ahaztu ez dezan;

-errepresaliatuei eta euren senideei erregimen frankistak zabaldutako sumario eta espediente guztiak ezeztatzeko eta ixteko ahalegin pribatu zein publikoetan laguntzea eta aholkatzea;

-estatu-kolpearen eta frankismoaren arduradunak eta garai hartako giza-eskubideen urratzaileak errugabetzeko egin diren edo egin daitezkeen lege guztiak deuseztatu arte ekitea;

- Berrizen dauden ikur eta toponimo frankisten ezabatzea edo aldatzea proposatzea, esaterako, kale-izenak, monumentuak, plakak edo udalbatzarrak inoiz emaniko ohorezko tituluak, Europako Kontseiluak 2006ko martxoan onartutakoaren arabera;

-frankismoaren garaian gertaturiko desjabetze politiko guztiak eta eginiko lapurreta politiko guztiak zerrendatzea eta berreskuratzen laguntzea, bereziki ‘desafectos al régimen’ deitutakoekin gertatutakoak;

-Berrizen erregimen frankistak erabilitako ‘oroimen-tokiak’ zerrendatzea, hala nola, kartzelak, atxilotzeko tokiak, hilobiak, borroka-tokiak eta errepresio-lekuak;

-aurreko ataleko ‘oroimen-tokiak’ Oroimenaren bilgunetzat eta askatasunaren eta duintasunaren ikurtzat izendatu daitezen proposatzea;

-frankismoak eta frankistek erabilitako hilobi komunak bilatzea, aurkitzea eta ikertzea; beharrezko ekimenak bertan egon daitezkeenen gorpuzkinak ikertu eta identifikatu daitezen bultzatzea;

-Oroimen Historikoa gordetzea eta transmititzea, eta gertatutako manipulazio historikoa deuseztatzen saiatzea; 

-Oroimen Historikoaren transmisioa eskolaren bidez egin dadin sustatzea;

-errepresioaren eta errepresaliatuen artxiboa sortzea edo sortzen laguntzea, dauden agiriak bilduz eta horretarako euren lekukotasuna eman nahi duten guztien testigantzak jasoz;

-Berrizko erakunde publikoak dituzten agiri guztiak egoki antolatzen eta gordetzen eragitea eta bultzatzea;

-Berrizko erakunde publikoak Espainian zehar dauden artxibategi eta dokumentategi guztietako berriztarren agiriak jasotzen ahalegindu daitezen bultzatzea;

-Euskal Herriko Oroimen Historikoaren Artxibategia egin dadin proposatzea eta eragitea; helburu bera duten elkarte zein erakundeekin biltzea eta elkar-lana bultzatzea;

-frankismoak errepresaliatutako guztien duintasuna eta ohorea aldarrikatzea; zentzu honetan beharrezkotzat joko diren ekitaldi eta ekimenak antolatzea, edo antolatzen laguntzea;

-antzeko helburuak dituzten beste elkarteekin eta erakundeekin lanean ekitea; asmo bereko elkarteak sortu daitezen eragitea eta bultzatzea;

-helburu berberak dituzten ekimenak zein ekitaldiak antolatzen laguntzea;

-‘revisionismo histórico’ deitutakoaren aurkako filosofia eta hatsarreak garatzea, 1936ko estatu-kolpearen eta osteko erregimen frankistarekin lotutakoa;  gizartea gertaera historikoen ezagutzaz interesatu dadin ahalegintzea; Oroimen Historikoaren errealitatea gizartean zabaltzea;

-frankismoaren hilketak ‘Crímenes de Lesa Humanidad’ bezala hartuak eta errugabegaitzat aldarrikatuak izan daitezen eskatzea eta sustatzea, Nazioarteko Amnistia erakundeak 2005eko uztailaren 18ko txostenean eta Europako Kontseiluak 2006ko martxoko aldarrikapenean gomendatutakoaren arabera;

Era berean, Berriz 1936 gogoratzen kultur elkartearen helburua da Berrizko historiaren, kulturaren, etnografiaren eta hizkuntzaren inguruan eginiko ikerketekin eta jasotako agiri, material eta ikerlan guztiekin Berrizko herri erakundeek artxibategi eta dokumentategi publiko eta modernoa egin eta kudeatu dezaten sustatzea eta eragitea.