Fusilatu eben alkatearen oroimen ekitaldiagaz bat eginda, Berriz 1936 Gogoratzen elkarte barria aurkeztu dabe. Herriko errepresaliatu guztien memoria berreskuratu guran sortutakoa.

Zer helburugaz sortu dozue Berriz 1936 Gogoratzen?

70 urte betetan dira aurten 37ko errepresino urteak hasi zirela, eta nire amama eta aitita kartzelaratu zitueela be bai. Garai haretan Berrizen benetan zer gertatu zen aztertzeko kezka sortu jat. Nire moduan, jakinmin hori daukien beste batzuk be aurkitu ditut, eta oraingoz talde txikitxoa garen arren, seguru nago talde sendoa sortuko dogula Berrizen.

Eskualde edo lurralde mailan zabaltzeko asmorik badozue?

Ez. Gure eremua Berriz izango da, gure xedea Berrizko gerra denporako memoria historikoa berreskuratzea delako.

Etorkizuneko egitasmorik?

Bai, gure elkartea oraintxe sortu barri da, hain zuzen be, gauzak egin eta antolatzeko helburuagaz: ekitaldiak, mahai-inguruak, erakusketak... hainbat gauza egin leitekez gogotsu lan eginda.

Memoria eta justizia aitatu dozuz berbaldian...

Sasoi haretan egin ziren epaiketak, esate baterako, bertan behera itzi behar dira. Argi daukagu horreek guztiak baliobakotu egin behar direla, ez direla historian geratu behar. Ezer ez badogu egiten, orduan bai: salaketa eta epaiketa injustu horreek guztiak horrelaxe ezagutuko ditue 200 urte barru.

Elkartearentzat zer balio dauka omenaldi horrek?

Gure elkartea ezagutzera emotea, herriko jentearen konfidantza eskuratzea. Guretzako ezinbestekoa da jenteak bere istorioak kontatzea. Herri honen historia egiteko, jentearen istorioak ezagutu behar doguz.